Trabayadores de Chupa Chups y Venturo XXI corten la carretera de Villamayor

Publicado el 27-07-2010

Trabayadores de les plantiyes de Chupa Chups (Piloña) y Venturo XXI (Llangréu) cortaron güei'l tráficu na carretera de Villamayor (Piloña) mientres una concentración conxunta. L'acción de protesta tien llugar con motivu del pasu pel pueblu qu'acueye la planta de fabricación de los míticos carambelos de la marcha que los emplegaos de la firma llangreana tán realizando a Cuadonga pa esixir una solución de futuru.

Sobre les 18.25 hores, los trabayadores ocuparon la carretera, provocando un gran atascu de coches que pasaben pela zona naquel momentu.

Antes de la protesta, el secretariu xeneral de Comisiones Obreres, Antonio Pino, presente nel actu, esixó la reabertura de Venturo XXI y la continuidá de l'actividá de Chupa Chups n'Asturies, y reclamó la intervención del Gobiernu autonómicu na busca de nuevos inversores nel primer casu, y n'evitar la desllocalización nel segundu. N'ambos conflictos adelantó que los sindicatos van siguir "trabayando dende la negociación y la movilización cola idea de garantizar qu'haya una reabertura y una recolocación".

Recordó que nes dos empreses hai participación pública. En Venturo XXI hai "un 49% d'instrumentos públicos", mientres que Chupa Chups "ye privada pero recibió ayudes públiques y los compromisos vinculaos a estes ayudes nun se completaron". Nel primer casu, recordó que "ye una empresa con costos de producción razonables, con calidá de productu, y na que les cayíes coyunturales nun tienen que conllevar el zarru".

Miguel fernández, representante del Comité de Venturo XXI, señaló que la de güei foi "una movilización más pa siguir defendiendo y reivindicando una solución, y aprovechando el pasu por Villamayor pa facer esta concentración conxunta colos compañeros de Chupa Chups, recibir el so apoyu y tresmiti-yos el nuestru".

Antonio Sánchez, secretariu del comité d'empresa de Chupa Chups, espresóse nos mesmos términos de solidaridá. Criticó amás que "la empresa (Chupa Chups) ta cerrada dende lo primero. Nun quieren nin sentir falar de l'actividá de Villamayor". La plantiya espera a una respuesta mañana a la última ufierta de plan social sindical, que trai una serie de propuestes sobre tresllaos, indemnizaciones y "que se ficiere cargu de la planta'l Principáu pa otra posible empresa que quiera garrar la instalación", según esplicó.