El PP pide'l cese de Marroquín pola "nefasta xestión" de les ayudes a la empresa

Publicado el 28-07-2010

El Grupu Parlamentariu Popular pide'l cese del xerente de la Sociedá Rexonal de Promoción del Principáu (SRP), Víctor González Marroquín, pola "nefasta xestión" de les ayudes públiques a la empresa de cartografía Venturo XXI, qu'estimen "superen los seis millones d'euros".

Pal PP, la compañía, que ta con un espediente de regulación d'empléu (ERE) y un procesu de lliquidación por deudes de dellos millones d'euros, contó con ayudes, sovenciones, préstamos y contratos del sector públicu sin que se-y esixere "nada" a cambiu y sin que se faiga "nada" por recuperar lo invertío.

En concreto, los diputaos del PP Alejandra Cuétara y José Cuervas-Mons señalaron qu'hai "coses bien escures" en tol procesu dende la constitución de la empresa nel 2005. "Primero, la venta a unos empresarios por 300.000 euros d'unos activos d'Hunosa tasaos en más d'un millón d'euros; y en segundu llugar l'actitú de responsables del Gobiernu qu'asumieron años de perdes sin facer nada", dixo Cuervas-Mons.

En rueda prensa en sede parlamentaria, los diputaos del PP dixeron que ye fundamental que Marroquín "dea una esplicación sobre lo asocedío, dao que ye conseyeru de Venturo XXI per parte del Principáu, que participa na sociedá con un capital de más de 545.000 euros (21%). Por ello, van pidir la so comparecencia en septiembre na Xunta Xeneral xunto al conseyeru d'Industria y Empléu, Graciano Torre.

Cuétara apuntilló que Marroquín nun dixo la verdá cuando en mayu d'esti añu indicó que se taben realizando xestiones pa restablecer esos más de mediu millón d'euros d'inversión de capital social, dao que n'avientu del 2009 "yá nun esperaba recuperar esi dineru de los contribuyentes".

"El PP quier llegar al fondu d'esti asuntu", afirmó la diputada, que reprochó que l'Executivu califique de "insolidarios" a los emplegaos públicos a los que se baxa'l sueldu, a los pensionistes a los que se-yos conxelen les pensiones o a los contribuyentes cuando se quexen de que se-yos suban los impuestos, mientres nun se xustifica qué se fizo con esi mediu millón d'euros que se dio a una empresa con dineru de los ciudadanos. "Esi dineru o se devuelve o se depuren responsabilidaes", esixó.

Cuétara criticó, amás, que "too sal gratis p'algunos mientres los demás tienen que pagar más y ser xulgaos d'insolidarios". A esto, Cuervas-Mons añadió que'l casu de Venturo XXI ye "ún de los asuntos más turbios" de xestión del Principáu.

Por ello, dende'l PP esperen alcontrar una solución que garantice l'actividá y l'empléu de los trabayadores, de la que s'asuman responsabilidaes, dao que consideren que ye un exemplu "de lo que nun se debe faer en promoción empresarial". "Ye un casu de mala xestión consentida y repartida d'ayudes ente amiguinos", dixo Cuervas-Mons.

CONTROL A SOCIEDAES PÚBLIQUES Y FUNDACIONES Amás, los diputaos del PP anunciaron que van realizar un siguimientu de toles cuentes de les sociedaes públiques y fundaciones del Principáu, p'analizar por qué "nun hai dineru" pa inversiones, obres públiques, o se faen polítiques d'axuste, cuando "antes sí lo había".

D'esta manera, Cuétara y Cuervas-Mons, ficieron referencia a les perdes rexistraes pola TPA nos exercicios 2007 y 2008, a la espera de qu'en próximos díes entre nel Rexistru Mercantil el detalle del exerciciu 2009. Dende'l PP repróchase que nesos dos años sumárense "más de 45 millones d'euros de perdes" y alviértese que van siguir estudiando les cuentes de les demás entidaes públiques.