El paru baxa n'Asturies en 1.400 persones nel segundu trimestre y la tasa queda nel 16,38%

Publicado el 30-07-2010

El númberu de paraos n'Asturies baxó en 1.400 persones nel segundu trimestre del añu, lo que supón un descensu del 1,8 por cientu con respecto al trimestre anterior y asitia'l númberu total de paraos en 78.600, con una tasa de paru del 16,38 por cientu, según la Encuesta de Población Activa.

En concreto, al zarru de xunu había n'Asturies 78.600 paraos, lo que significa sicasí 10.300 paraos más qu'hai un añu (un aumentu del 15 por cientu).

Nel conxuntu d'España, el paru aumentó en 32.800 persones ente abril y xunu, colo que la tasa de desempléu repicó hasta'l 20,09%, y el volume total de paraos marcó un nuevu récor: 4.645.500 persones taben sin empléu al acabar el mes pasáu, lo que supón 508.000 paraos más que l'añu anterior.

Y ye que la tasa de desempléu de la media nacional asitióse nel 20,09%, esto ye, cuatro centésimes superior a la del trimestre anterior y contrasta cola tasa del 17,9% existente un añu atrás. Con esta cifra, la tasa de paru algama n'España'l so nivel más altu de la serie histórica comparable, qu'entama nel 2001.

OCUPAOS La reducción del paru nel segundu trimestre del añu coincide, sicasí, con un descensu del númberu d'ocupaos, dao qu'ente abril y xunu 2.000 persones salieron del mercáu llaboral (-0,49%, perbaxo del aumentu del 0,45% de la media nacional), asitiándose la cifra global d'ocupaos n'Asturies en 401.500 (y en más de 18,4 millones en tol país).

En comparanza col mesmu periodu del añu anterior, la ocupación cayó un 4,13% nel Principáu (y un -2,47% n'España), al perdese 17.300 puestos de trabayu na rexón.

POBLACIÓN ACTIVA Pela so parte, la población activa asitióse a últimos de xunu na comunidá en 480.100 persones, unes 3.400 menos que nel trimestre anterior. Esto significa un descensu del 0,71%, frente a la subida de la media nacional (+0,5%).

En comparanza col segundu trimestre del 2009, la población activa baxó en 7.000 asturianos, un -1,45%, mientres que subió nun 0,17% n'España, hasta superar los 23 millones.

Con too ello, la tasa d'actividá asturiana quedó nel 51,54% perbaxo de la media nacional, que ye del 60,11%.

HOMES Y MUYERES De los cerca de 78.600 paraos rexistraos al acabar xunu n'Asturies, unos 40.400 yeren homes y les 38.200 restantes, muyeres. Ente los primeros, la tasa de paru yera del 15,55%, mientres qu'ente les segundes ye superior, elevándose la tasa de desempléu femenín hasta'l 17,35%.

No referente a la población ocupada, unes 401.500 persones, la mayoría tamién yeren homes (219.500, frente a 182.000 muyeres). Asina, la tasa d'actividá ente los primeros yera del 58,86% y ente les segundes, del 44,94%.