Rajoy esixe al Gobiernu qu'esplique qué ta faciendo con presos etarres

Publicado el 30-07-2010

El presidente del PP, Mariano Rajoy, esixó al Gobiernu de José Luis Rodríguez Zapatero qu'esplique "en convocatoria pública" a los españoles la política penitenciaria que ta aplicando a los miembros d'ETA. Según sorrayó, l'Executivu "tien que ser tresparente" si quier apoyos a la política antiterrorista.

"Lo que quiero y tien de facelo, ye qu'esplique'l mesmu Gobiernu en convocatoria pública a los españoles, qué ye esactamente lo que ta faciendo", declaró Rajoy na so intervención ante'l Comité Executivu de Castiella-La Mancha.

Como yá fizo'l pasáu martes ante la planta mayor del PP, el líder de la oposición almitió qu'entren nel marcu de la llegalidá los permisos penitenciarios a etarres pero sorrayó que'l Gobiernu tamién podría tomar la decisión de nun dalos. "Yá sé qu'estos cambios d'etarres d'un llugar a otru son llegales o nun son illegales, pero tamién ye llegal nun facelo", calcó.

SI NUN COMETE ERRORES, EL PP VA APOYAR AL GOBIERNU Por eso, calcó nel so pidimientu de tresparencia al Executivu alegando que "les víctimes, los partíos y los españoles" tienen "derechu a saber exactamente lo que se ta faciendo y por qué". "El Gobiernu tien que dase cuenta de que si quier apoyos, que los tuvo y va siguir teniendo si nun comete errores, tien qu'esplicalo a la xente porque la xente tien derechu a sabelo", calcó.

Nel so discursu, Rajoy sorrayó que'l PP ta brindando'l so apoyu al gabinete socialista "pa que nun se negocie con ETA" y pa que la organización terrorista o les sos franquicies "nun puean presentase a les elecciones" del próximu añu, asina como pa que se cumpla "la llei" y se "derrote" a la banda.

A lo último, recordó que'l Gobiernu "negoció" cola banda terrorista na pasada llexislatura, "algo que se demostró que yera un error". Dempués, prosiguió, decidió "cambiar de criteriu" y comprometióse a "nun negociar con ETA".