Prohíben el bañu tres acolumbrar aguamales muertes en playes de Ribadeva, Llanes y Caravia

Publicado el 30-07-2010

Los servicios de salvamentu de distintos arenales del oriente de la rexón, ascritos al Plan de Salvamentu en Playes d'Asturies (SAPLA 2010), comunicaron al Centru de Coordinación d'Emerxencies del 112-Asturies que tán columbrando exemplares muertos d'aguamales de la especie carabela portuguesa en delles de los sos arenales.

Según informó'l 112-Asturies, trátase de "casos puntuales y exemplares aislaos" que, en delles zones, llegaron hasta la vera del arenal.

Hasta les 15 hores topóse un exemplar d'esti moluscu na playa de La Franca, en Rivadeva; otru na playa de Torimbia, cuatro en Samartín y dellos en Toranda, Barro, Borizo y San Antolín (Llanes) y nel Arenal de Morís.

Los servicios de salvamentu d'algunos d'estos arenales decidieron prohibir el bañu por prevención hasta saber la so evolución. El departamentu de Protección Civil del 112-Asturies ta realizando un siguimientu de los avistamientos y caltién contactu permanente colos coordinadores de los servicios de salvamentu nes zones afectaes.

Nesti sen, el serviciu de Protección Civil del 112-Asturies, señala que la llegada d'estes aguamales ta provocada por un bancu de carabeles portugueses detectáu nel País Vacu la selmana pasada que se mueve hacia la mariña asturiana pela mar del nordeste.

El Ministeriu de Mediu Ambiente, Mediu Rural y Marín punxo en marcha esti añu la Campaña d'Estudiu y Detección de les Agregaciones d'Aguamales y Residuos na Costa Española p'avanzar na conocencia de les poblaciones d'aguamales y nel porqué de los sos proliferaciones.